Kynslóð með kynslóð og stétt með stétt

Fyrir nokkrum árum hlustaði ég á viðtal við konu í útvarpinu, sem var að segja frá ráðstefnu sem var framundan, í lok viðtalsins sagði hún: “Það eru allir velkomnir, börn, unglingar, fullorðið fólk og aldraðir”! Mér var hugsað til þess hvort aldraðir væru ekki fullorðið fólk? Þetta hefur væntanlega verið ómeðvituð  kynslóða aðgreining hjá konunni!  Að skipta fólki í hópa – draga það í dilka- endurspeglast því miður í svo mörgu. Við sem komin eru af léttasta skeiði eigum erfitt með að skilja þetta viðhorf. Þriðja kynslóðin er ekki annars flokks hópur í þjóðfélaginu! Öldruðum hefur fjölgað mun meir en í öðrum aldurshópum. Nú er svo komið að rödd þeirra verður æ meira áberandi í samfélaginu. Þeir hafa tekið málin í sínar hendur, gera ráðstafanir til að tryggja afkomu sína á efri árum og búa í haginn þegar komið er að því sem kallað hefur verið þriðja aldursskeiðið. Þriðja kynslóðin hefur lifað tímana tvenna og á drjúgan reynslubanka til að miðla þeim yngri og  reynsluminni ef því er að skipta!

Þess vegna vorum við í stjórn SES ekki sátt þegar í ljós kom  að þeir sem voru 76 ára eða eldri voru útilokaðir í skoðanakönnunum, þegar leitað var viðhorfa til ýmissa þátta í þjóðmálum, svo sem stuðning við ríkisstjórnir og stjórnmálaflokka. Þar var úrtakið bundið við 18-75 ára! 76ára og eldri sem eru 7.55% af kosningabærum mönnum voru útilokaðir í skoðanakönnunum en svo sannarlega eftirsóttir í kosningum. Við gerðum athugasemd við þetta hjá Capacent Gallup og nú  hefur það verið leiðrétt og efrimörk í skoðanakönnunum afnumin. Nú geta líka þeir sem eru 76 ára og eldri tekið þátt í slíkum könnunum ef svo ber undir. Það er ekki síður mark á þeim takandi, enda er eldra fólk oft staðfast í skoðunum t.d. á pólitískum vettvangi, heldur sig gjarnan við sinn “flokk” hvað sem á dynur!!

Höfum hugfast að stefna Sjálfstæðisflokksins byggir á sjónarmiðum mannúðar, frelsi einstaklingsins til orða og athafna, og um leið á góðu velferðarkerfi með hjálp til sjálfshjálpar þeim til handa sem þess þurfa, lýðræðislegum stjórnarháttum, virðingu fyrir umhverfinu og gæðum jarðar.

Stefna Sjálfstæðisflokksins hefur staðist tímans tönn með því að aðlagast þeim breytingum sem orðið hafa í þjóðlífinu á undanförunum áratugum og það verður verkefni landsfundarins nú að leggja fram markvissa stefnu í breyttu umhverfi á þessum erfiðu tímum sem nú blasa við heimilum og atvinnufyrirtækjum í landinu.  

Stöndum saman sjálfstæðismenn ungir sem aldnir, fjarlægjum “girðingarnar” og hættum að draga fólk í dilka

Kynslóð með kynslóð og stétt með stétt!

- Salome Þorkelsdóttir