Emil Örn Kristjánsson situr fyrir svörum

Hver er stefna þín varðandi framtíðarskipulag Reykjavíkurborgar. Hvar sérðu sóknarfæri í nýrri byggð og hvar sérðu hindranir?
Ég vil helzt að byggt veri meira eftir ströndinni. Geldinganes og Kjalarnes gætu verið ákósanlegir staðir en skipulag byggðar á þessum svæðum er þó háð því að að endanlegt skipulag Sundabrautar liggi fyrir. Einnig er ég mjög hrifinn af
ýmsu sem kom fram í hugmyndinni um sk. “eyjabyggð”. T.d. að byggja út í Örfirsey og á frekari uppfyllingum og teygja borgina aðeins lengra í vestur og gera miðbæinn svolítið meira miðlægan. Eins og er þá liggur hann yzt á nesinu.
Svo þarf að taka ákvörðum um endanlega legu Sundabrautar. Það stendur allri skipulagsvinnu fyrir þrifum að ekki liggi fyrir hvernig og hvar þetta stóra samgöngumannvirki á að liggja.

Vilt þú lækka útvar í Reykjavík? Ef já, þá hversu mikið á næsta kjörtímabili.
Auðvitað vil ég lækka útsvar. Ég held að allir hljóti að vilja lækka útsvar. Það er samt ekkert útlit fyrir að slíkt sé í boði í bráð og því tilgangslaust að vera að nefna einhverjar tölur.

Vilt þú lækka fasteignagjöld í Reykjavík? Ef já, þá hversu mikið á næsta kjörtímabili?
Sama svar og við fyrri spurningu um útsvar. Þó vil ég nefna að það er búið að framkvæma það sem sk. “skítaskattur” átti að kosta. Það er því tímabært að fella hann niður. Vilji borgin halda áfram að innheimta þá upphæð væri heiðarlegast að kalla hana einhverju öðru nafni og eyrnamerkja féð öðru þörfu verkefni, sem borgin þarf að standa straum af.

Telur þú að flugvöllurinn eigi að fara úr Vatnsmýrinni. Ef já, þá hvert?
Fyrir mér er þetta engin einföld "já eða nei" spurning. Það liggja gild rök fyrir afstöðu minni og því læt ég þau fylgja með hér. Það sem er innan gæsalappa er svo til orðrétt það sem ég hef sagt um þetta sama mál í pontu á 3 síðustu landsfundum Sjálfstæðisflokksins.

Reykjavík er höfuðborg Íslands og eigi hún að standa undir því nafni af einhverjum metnaði þarf hún einnig að vera samgöngumiðstöð fyrir allt landið. Meðan enginn hefur getað bent á annan og betri valkost fyrir flugvöll í
höfuðborginni en þann sem hann stendur á í dag er tilgangslaust hjal að vera að tala um að flytja hann eitt eða annað.
Reykjavíkurflugvöllur er ágætlega staðsettur til þess að gegna sínu hlutverki. Samgöngumannvirki á við flugvelli og járnbrautarstöðvar taka alltaf pláss og því verður ekki breytt. Ég tek fram að ég tel rétt að flugvöllurinn verði áfram
á aðalskipulagi borgarinnar og vitna í rökfærslu mína hér að ofan.

Vilt þú beita þér gegn samræmdum kjarasamningum kennara, t.d. þannig að grunnskólar í Reykjavík fái heimild til að semja sjálfstætt við sína kennara?
Ekki myndi ég beita mér beinlínis gegn samræmdum kjarasamningum kennara, þó það sé mín persónulega skoðun að launþegi eigi helzt að semja beint við sinn vinnuveitanda. Mér finnst þó að skólastjórnendur og kennarar eigi að geta samið um greiðslur umfram lágmarkslaun. Slíkt væri aðeins hvetjandi til frekari árangurs og metnaðar í starfi.

Hvað vilt þú gera til þess að Reykjavík verði eftirsóknaverð borg fyrir ungt fólk að búa og starfa í?
Nú geri ég ráð fyrir að hér sé aðallega átt við fólk sem er að koma sér upp húsnæði og á börn sem eru að hefja nám í grunnskóla.  Reykjavík þarf áfram að geta boðið fjölbreytt úrval búsetu. Það þarf að ríkja skynsöm skipting á húsnæðismarkaði milli einbýlis og fjölbýlis og einnig þéttbýlla, háreistra, lágreistra og dreifðra hverfa. Þannig getur hver og einn valið búsetu að eigin smekk og getu og fest sitt fé í því húsnæði sem þeim hugnast bezt. Hlúa þarf að grunnskólum borgarinnar svo þeir standi áfram undir nafni sem menntastofnanir þar sem faglegur metnaður ríkir meðal starfsfólks. Hvetja þarf jafnframt til stofnunar einkaskóla í úthverfum borgarinnar til að auka valfrelsi foreldra grunnskólabarna. Það er einkennilegt að flestir sem fá þá hugmynd að stofna einkaskóla leiti fyrst að húsnæði í miðbæ Reykjavíkur. Borgin gæti haft áhrif með því að auðvelda áhugasömu skólafólki að stofna skóla sína þar sem fleiri grunnskólabörn er að finna.

Emil Örn Kristjánsson