Vel sóttur hádegisfundur Heimdallar: Stjórnvöld hvött til að gera betur í kynningarmálum Íslands
Hádegisfundur Heimdallar á Kaffi Sólon í gær var vel sóttur en hann var undir yfirskriftinni "Brjálast Bretarnir?" og átti því ágætlega við þar sem aðeins var tæp klukkustund liðin frá því að forseti Íslands vísaði Icesave-lögunum í þjóðaratkvæðargreiðslu. Á fundinum kom fram gagnrýni á hvernig staðið hefur verið að Icesave-málinu af hálfu stjórnvalda að undanförnu.
Á fundinum töluðu þeir Andrés Jónsson, formaður Almannatenglafélags Íslands, Pétur H. Blöndal alþingismaður og Jóhannes Skúlason stjórnarmaður í Indefence.
Allir framsögumenn lögðu á það áherslu að ákvörðun forseta skapaði ákveðin tækifæri fyrir Íslendinga þar sem málið fengi nú athygli á nýjan leik og við hefðum möguleika á því að koma okkar sjónarmiðum á framfæri. Ræðumennirnir voru hins vegar sammála því að ekki hefði verið nægjanlega vel að þessu staðið hingað til og að fyrstu skref ríkisstjórnarinnar lofuðu ekki góðu.
Andrés Jónsson almannatengill sagði að þrátt fyrir að hann teldi að Ísland bæri ábyrgð á því að borga sínar skuldbindingar í málinu þá hefði hann verið ósáttur við hvernig staðið hefði verið að málinu. Skort hefði á sannfæringu þingmanna í málinu og ýmis líkindi væru með fjölmiðlamálinu frá 2004. Andrés greindi einnig frá því að hann hefði í upphafi málsins reynt að koma þeim skilaboðum áleiðis til stjórnarmeirihlutans að ná sem breiðastri sátt um málið. Hann hefði hins vegar fengið þau svör innan úr Samfylkingunni að það væri þægilegast að láta VG taka málið í fangið fyrst þeir vildu það.
Pétur H. Blöndal þingmaður sagði að nú yrði að leggjast í víking og senda þingmenn skipulega til Evrópu til þess að hitta evrópska kollega sína. Hann sagðist sjálfur hafa átt samtöl við ýmsa erlenda þingmenn, m.a. hollenska, sem hefðu sýnt málinu mikinn skilning eftir að hafa heyrt okkar hlið málsins. Þetta hefði vantað í grundvallaratriðum í málið og baráttu Íslands út á við.
Sjálfur sagði Pétur að hann hefði alltaf lagt áherslu á einföld skilaboð í málinu: Ísland ætlar að borga - en við ætlum að borga þannig að við getum ráðið við það. Málið væri í reynd svo einfalt - með fyrirvörunum frá því í sumar var sett upp fyrirkomulag sem gerði Íslandi kleift að ráða við að borga af skuldinni en með nýju samningunum frá því í haust væri búið að taka allt bit úr þeim og setja upp nýtt fyrirkomulag sem væri mjög illviðráðanlegt fyrir Ísland. Pétur nefndi sem dæmi að við greiddum um 100 milljónir á degi hverjum í vexti af Icesave til Breta, enda hefðu lánskjörin verið mun hærri en eðlilegt mætti teljast.
Jóhannes Þór Skúlason kom seint á fundinn þar sem hann hafði staðið í ströngu við að taka við símtölum og fréttaviðtölum frá erlendum fjölmiðlum í kjölfar ákvörðunar forseta. Jóhannes ítrekaði þau skilaboð Indefence hópsins að Ísland ætti að greiða skuldir sínar en að sú greiðsla yrði að vera viðráðanleg fyrir landið og ríkissjóð.
Hann sagðist hafa lagt á það mikla áherslu í samtölum sínum við erlenda fréttamenn að með þessari ákvörðun forsetans væri það alls ekki svo að Ísland væri að hafna greiðsluskyldu sinni. Þetta væru fréttir fyrir flesta sem hann talaði við og tónninn og viðhorfið breyttist yfirleitt til muna þegar þetta kæmi fram. Jóhannes bætti því við að það væri umhugsunarefni að grunnskólakennari í Breiðholtinu eins og hann sjálfur væri að standa í því að taka við símtölum frá heimspressunni en ekki sérfræðingar stjórnvalda, eins og eðlilegt væri. Hann hefði hins vegar saknað þess í málinu öllu að stjórnvöld tækju sig á hvað þetta varðar og hvatti þau til þess að gera það.
